Tags : RAJNATH SINGH_BIJOY MAOHAPTRA_PRATAP SARANGI

ଭୁବନେଶ୍ୱର : ବିଜେପୁର ଉପନିର୍ବାଚନ ଧର୍ମେନ୍ଦ୍ରଙ୍କ ପତିଆରା ଉପରେ ପ୍ରଶ୍ନବାଚୀ ଲଗାଇଥିବାବେଳେ ବିଜେପି ରାଜନୀତିରେ ବି ତାତି ବଢ଼ିବାରେ ଲାଗିଛି  । ବିଶେଷକରି ନୂଆଦିଲ୍ଲୀରେ ଦଳର ଦୁଇ ନେତା ବିଜୟ ମହାପାତ୍ର ଓ ପ୍ରତାପ ଚନ୍ଦ୍ର ଷଡ଼ଙ୍ଗୀ ବରିଷ୍ଠ ନେତାଙ୍କୁ ଭେଟିବା ଘଟଣା ଓଡ଼ିଶା ବିଜେପିରେ ଚର୍ଚ୍ଚା ସୃଷ୍ଟିକରିଛି  । 

ନିକଟରେ ନୂଆଦିଲ୍ଲୀ ଯାଇ ବିଜେପିର ବରିଷ୍ଠ ନେତାମାନଙ୍କୁ ଭେଟିଛନ୍ତି ବିଜୟ ମହାପାତ୍ର  । ତେବେ ତାଙ୍କୁ ଦିଲ୍ଲୀରୁ ଡକରା ଆସିଥିଲା ନା ସେ ନିଜଆଡୁ ଭେଟିବାକୁ ଯାଇଛନ୍ତି ତାହା ସ୍ପଷ୍ଟ ହୋଇନାହିଁ  । କେତେକଙ୍କ ମତରେ ବିଜୟ ବାବୁ ଭାରି ସ୍ୱାଭିମାନୀ  । ଦିଲ୍ଲୀରୁ ଡକରା ଆସିନଥିଲେ ସେ ଯିବାର ଚାନ୍ସ ହିଁ ନାହିଁ  । ତେଣୁ ଦିଲ୍ଲୀରୁ ହିଁ ତାଙ୍କୁ ଡାକରା ଆସିଛି ବୋଲି ସେମାନେ ମତବ୍ୟକ୍ତ କରୁଛନ୍ତି  । ତେବେ ଦିଲ୍ଲୀରେ ବିଜୟ ଅମିତ ଶାହାଙ୍କୁ ସାକ୍ଷାତ କରିପାରିନଥିବା ଜାଣିବାକୁ ମିଳିଛି  । ପୂର୍ବତନ ବିଜେପି ସଭାପତି ତଥା ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂହ ଓ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କୁ ବିଜୟ ମହାପାତ୍ର ଭେଟିଛନ୍ତି  । ଯଦି ଦିଲ୍ଲୀରୁ ଡକରା ଆସିଥା’ନ୍ତା ତେବେ ଅମିତ୍ ଶାହାଙ୍କ ସହ ତାଙ୍କର ସାକ୍ଷାତ ଆଲୋଚନା ହୋଇପାରିଥା’ନ୍ତା  । କାହିଁକିନା ଏବେ ଅମିତ ଶାହାଙ୍କ ବ୍ୟତୀତ ଆଉ କୌଣସି ନେତା ସଂଗଠନ ସଂକ୍ରାନ୍ତରେ ନିଷ୍ପତି ନେଉନାହାନ୍ତି କି ଆଲୋଚନା କରୁନାହାନ୍ତି  । ଅନ୍ୟ ଏକ ସୂତ୍ର ଅନୁଯାୟୀ ନିକଟରେ ବିଜୟଙ୍କ ଅନୁଗତ ତଥା ପାଟକୁରାରୁ ବିଜେପି ଟିକେଟରେ ଲଢ଼ିଥିବା ମାନସ ମହାନ୍ତି ନୂଆଦିଲ୍ଲୀ ଯାଇଥିଲେ  । ସେଠାରେ ସେ ଧର୍ମେନ୍ଦ୍ରଙ୍କୁ ଭେଟିବା ପାଇଁ ଉଦ୍ୟମ କରିଥିଲେ  । କିନ୍ତୁ ସେ ବିଜୟ ମହାପାତ୍ରଙ୍କ ସମର୍ଥକ ହୋଇଥିବାରୁ ତାଙ୍କୁ କୁଆଡେ଼ ସୁଯୋଗ ମିଳିନଥିଲା  । ବାରବାର ବିଫଳ ହେବା ପରେ ମାନସ ବିଜୟଙ୍କ ସହ ଏନେଇ ଆଲୋଚନା କରିଥିଲେ  । ମାନସଙ୍କ ସହ କ୍ଷୀତିଶ ନାମକ ଅନ୍ୟ ଜଣେ ବିଜୟ ସମର୍ଥକ ମଧ୍ୟ ଆଲୋଚନା ବେଳେ ଉପସ୍ଥିତ ଥିଲେ  । ବିଜୟ ବାବୁଙ୍କ ପରବର୍ତୀ ରଣନୀତି କ’ଣ ତାହା ସେମାନଙ୍କୁ ଜାଣିବାକୁ ଚାହିଁଥିଲେ  । ଯଦି ବିଜେଡ଼ି ଯିବା କଥା ଚାଲନ୍ତୁ ଯିବା, ଯଦି ବିଜେପିରେ ରହିବା ତେବେ ସଂଗଠନ କରିବା  । ନହେଲେ ଆମ ଭବିଷ୍ୟତ ଅନ୍ଧାର ହୋଇଯିବ ବୋଲି ସେମାନେ ମତବ୍ୟକ୍ତ କରିଥିଲେ  । କାହିଁକିନା ବିଜୟ କେନ୍ଦ୍ରାପଡ଼ା ରାଜନୀତି ଅବା ନିଜ ମହାକାଳପଡ଼ା ଓ ପାଟକୁରାରେ ବିଜେପି ସଂଗଠନ ବିସ୍ତାର ପାଇଁ ଆଦୌ ମନୋନିବେଶ କରୁନାହାନ୍ତି  । ଏହି ସୁଯୋଗରେ ପାଟକୁରା ଆସନରୁ ବିଜେପି ଟିକେଟ ପାଇଁ ଆଶାୟୀ ତଥା ପୂର୍ବତନ ଯୁବମୋର୍ଚ୍ଚା ସଭାପତି ଉମାକାନ୍ତ ପଟ୍ଟନାୟକ ବାଇକ ଶୋଭାଯାତ୍ରା କରିବା ସହ ‘ମୋ ବୁଥ୍, ସବୁଠୁ ମଜବୁତ୍’ କାର୍ଯ୍ୟକ୍ରମ ଜାରି ରଖିଛନ୍ତି  । ତେବେ ବିଜୟ ସବୁଜ ସଂକେତ ଦେଉନଥିବାରୁ ମାନସ ପାଟକୁରାରେ ଏହି କାର୍ଯ୍ୟକ୍ରମ କରିପାରୁନାହାନ୍ତି  । ସେପଟେ ବିଜେଡ଼ିରେ ବିଜୟଙ୍କ ମିଶିବା ନେଇ ହେଉଥିବା ଚର୍ଚ୍ଚା ଥମିଯାଇଛି  । ଏଭଳି କ୍ଷେତ୍ରରେ ବିଜୟ ନିଜର ପରବର୍ତୀ ରାଜନୀତିକ ଲକ୍ଷ୍ୟ ଓ ଭବିଷ୍ୟତ ସମ୍ପର୍କରେ ସ୍ଥିର କରିବା ନିମନ୍ତେ ଦିଲ୍ଲୀ ଯାଇଥିଲେ  । ରାଜନାଥ ଓ ଜେଟଲୀଙ୍କ ସହ ତାଙ୍କର ଭଲ ସମ୍ପର୍କ ଥିବାବେଳେ ରାଜ୍ୟ ରାଜନୀତିର ବିଭିନ୍ନ ଦିଗ ସମ୍ପର୍କରେ ଆଲୋଚନା କରିଛନ୍ତି  । ରାଜନାଥ ଓ ଜେଟଲୀ ତାଙ୍କ ସହ ଆଲୋଚନା କରିଥିବାବେଳେ ବିଜୟଙ୍କୁ ବିଜେପିର କେତେକ ଦାୟିତ୍ୱ ମିଳିବ ବୋଲି ଚର୍ଚ୍ଚା ହେଉଛି  । 

ଅପରପକ୍ଷରେ ବିଜେପିର ଅନ୍ୟତମ ଟାଣୁଆ ନେତା ପ୍ରତାପ ଚନ୍ଦ୍ର ଷଡ଼ଙ୍ଗୀ ନୂଆଦିଲ୍ଲୀରେ ବରିଷ୍ଠ ନେତାମାନଙ୍କୁ ଭେଟିଛନ୍ତି  । କିନ୍ତୁ ବାସ୍ତବରେ ପ୍ରତାପ ନୂଆଦିଲ୍ଲୀ ସେହି ଉଦେ୍ଧଶ୍ୟ ନେଇ ଯାଇନଥିଲେ  । ବାବା ବଳିଆଙ୍କ ଏକ କାର୍ଯ୍ୟକ୍ରମ ସହ ଅଖଣ୍ଡ ଭାରତର କାର୍ଯ୍ୟକ୍ରମରେ ଯୋଗଦେବାକୁ ପ୍ରତାପ ନୂଆଦିଲ୍ଲୀ ଯାଇଥିଲେ  । ନୂଆଦିଲ୍ଲୀରେ ରହିବା ସମୟରେ ସେ ଜାତୀୟ ନେତାଙ୍କ ସହ ସାକ୍ଷାତ କରିବାକୁ ଉଦ୍ୟମ କରିଥିଲେ  । ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ଓ ରାଜନାଥ ସିଂହଙ୍କ ସହ ପ୍ରତାପ ଭେଟିଛନ୍ତି  । ତେବେ ବରିଷ୍ଠ ନେତାଙ୍କ ସହ ପ୍ରତାପ କି ଆଲୋଚନା କରିଛନ୍ତି ତାହା ସ୍ପଷ୍ଟ ହୋଇନାହିଁ  । ୨୦୧୬ ଜାନୁଆରୀ ୧୬ରେ ବସନ୍ତ ପଣ୍ଡା ସଭାପତି ରାଜ୍ୟ ବିଜେପିର ଦାୟିତ୍ୱ ନେଇଥିଲେ  । ଅର୍ଥାତ୍ ଏହି କାର୍ଯ୍ୟକାଳ ସରିବାକୁ ଆଉ ୧୦ ମାସ ସମୟ ବାକି ରହିଛି  । ତେବେ ଜାନୁଆରୀରେ ନୂଆ ସଭାପତିଙ୍କୁ ନିର୍ବାଚିତ କରିବା ପୂର୍ବରୁ ଦଳ ନଭେମ୍ବର ବେଳୁ ମାନସମନ୍ଥନ ଆରମ୍ଭ କରିବ  । ନୂଆଦିଲ୍ଲୀର ସୂତ୍ର ଅନୁଯାୟୀ ଏବେ ରାଜ୍ୟ ସଭାପତି ଦୌଡ଼ରେ ପ୍ରତାପ ଚନ୍ଦ୍ର ଷଡ଼ଙ୍ଗୀ ସର୍ବାଗ୍ରେ ରହିଛନ୍ତି  । ସୁରେଶ ପୂଜାରୀ, ଜୁଏଲ ଓରାମ୍, କନକବର୍ଦ୍ଧନ ସିଂହଦେଓ ଓ ବସନ୍ତ ପଣ୍ଡା ଲଗାତର ଭାବେ ସଭାପତି ରହି ଆସିଥିବାବେଳେ ଦୀର୍ଘଦିନ ଧରି ଉପକୂଳ ଓଡ଼ିଶାର ନେତା ରାଜ୍ୟ ସଭାପତି ହୋଇପାରିନାହାନ୍ତି  । ତେଣୁ ପ୍ରତାପ ସଂଘ ପୃଷ୍ଠଭୂମିରୁ ଆସିଥିବା ଜଣେ ଟାଣୁଆ ନେତା ହୋଇଥିବାବେଳେ ଉପକୂଳ ଓଡ଼ିଶାର ପ୍ରତିନିଧିତ୍ୱ କରୁଛନ୍ତି  । ବସନ୍ତ ପଣ୍ଡାଙ୍କୁ ମଧ୍ୟ ଦଳ ଆଉ ରିପିଟ୍ କରିବାକୁ ଚାହୁଁନାହିଁ  । କାହିଁକିନା ନିଜ ନିର୍ବାଚନମଣ୍ଡଳୀରେ ମଧ୍ୟ ସେ ପରାଜୟର ସାମ୍ନା କରିଛନ୍ତି  । ପ୍ରତାପଙ୍କ ପାଇଁ ଧର୍ମେନ୍ଦ୍ର କେଁ ପୂରାଇବେ ବୋଲି ପ୍ରଥମେ ଚର୍ଚ୍ଚା ହେଉଥିଲା  । ତେବେ ବିଜେପିର ମିଶନ ଘୁଂଚିବାର ଆଶଙ୍କା ବଢ଼ି ଯାଇଥିବାରୁ ଧର୍ମେନ୍ଦ୍ର ଏଥିରେ ବାଧକ ସାଜିବେ ନାହିଁ ବୋଲି ଆଶା କରାଯାଉଛି  । କାହିଁକିନା ଧର୍ମେନ୍ଦ୍ର ଭଲଭାବେ ଜାଣନ୍ତି ବିଜେପିର ସମର୍ଥକ ହାୱାରେ ବଢ଼ିନାହିଁ  । ଏଥିପାଇଁ ବିଭିନ୍ନ ପ୍ରକାର ବଳ ବି ଖର୍ଚ୍ଚ ହୋଇଛି  । ମିଡ଼ିଆ ବଳରୁ ନେଇ ଅର୍ଥ ବଳ ପର୍ଯ୍ୟନ୍ତ ସବୁ ଖଟାଯାଇଛି  । ଯଦି ପ୍ରତାପ ତାଙ୍କୁ ଗୁରୁତ୍ୱ ନଦିଅନ୍ତି ତେବେ ଭବିଷ୍ୟତରେ ସେ ଦିଲ୍ଲୀ ନେତୃତ୍ୱଙ୍କୁ ପ୍ରଭାବିତ କରି ଚେକ୍ ଦେବାରେ ସମର୍ଥ ହେବେ  । ଆଗାମୀ ଦିନରେ ରାଜ୍ୟ ବିଜେପି ରାଜନୀତି କେଉଁ ମୋଡ଼ ନେବ ତାହା ଉପରେ ନଜର ରହିବା ସ୍ୱାଭାବିକ  । 

ଅଧିକ