Tags : test match

ସେଞ୍ଚୁରିଆନ: ଏଠାରେ ଖେଳାଯାଉଥିବା ଭାରତ-ଦକ୍ଷିଣ ଆଫ୍ରିକା ପ୍ରଥମ ଟେଷ୍ଟରେ ବିରାଟ କୋହଲି ଟସ୍‌ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ । ଏହି ନିଷ୍ପତ୍ତିକୁ ସଠିକ୍‌ ପ୍ରମାଣିତ କରିଛନ୍ତି ଭାରତୀୟ ବ୍ୟାଟ୍‌ର । ବିଶେଷ କରି ଉପ-ଅଧିନାୟକ କେଏଲ ରାହୁଲ ବକ୍ସିଂ ଡେ ଟେଷ୍ଟରେ ଦମଦାର ଶତକୀୟ ଇଂନିସ ଖେଳି ଭାରତକୁ ଦୃଢ ସ୍ଥିତିରେ ପହଞ୍ଚାଇଛନ୍ତି ।
ରାହୁଲ ୨୪୮ ବଲ୍‌ର ସାମ୍ନା କରିଥିବାବେଳେ ୧୬ଟି ଚୌକା ଓ ଗୋଟିଏ ଛକା ସହାୟତାରେ ପ୍ରଥମ ଦିନ ଖେଳ ଶେଷ ସୁଦ୍ଧା ୧୨୨ରନରେ ଅପରାଜିତ ଅଛନ୍ତି । ଅନ୍ୟତମ ଓପନର ମୟଙ୍କ ଅଗ୍ରୱାଲ ମଧ୍ୟ ୬୦ ରନ୍‌ର ଅର୍ଦ୍ଧଶତକୀୟ ଇଂନିସ ଖେଳିଛନ୍ତି । ଏହା ରାହୁଲଙ୍କ ସପ୍ତମ ଟେଷ୍ଟ ଶତକ ଓ ବିଦେଶ ମାଟିରେ ଷଷ୍ଠ ଶତକ । ୨୦୦୭ରେ ୱାସିମ ଜାଫରଙ୍କ ପରେ ଦ୍ବିତୀୟ ଭାରତୀୟ ଓପନର ଭାବେ ଦକ୍ଷିଣ ଆଫ୍ରିକା ମାଟିରେ ଶତକ ହାସଲ କରିବାର ରେକର୍ଡ କରିଛନ୍ତି ରାହୁଲ ।ଏହା ପୂର୍ବରୁ ସେ ଇଂଲଣ୍ଡ ଓ ଅଷ୍ଟ୍ରେଲିଆ ମାଟିରେ ମଧ୍ୟ ଶତକ ହାସଲ କରିସାରିଛନ୍ତି । ଦକ୍ଷିଣ ଆଫ୍ରିକା ଗସ୍ତରେ ଭାରତୀୟ ଟିମ ପାଇଁ ପ୍ରଥମ ଇଂନିସରେ ବ୍ୟାଟିଂ ସର୍ବଦା ଆହ୍ବାନପୂର୍ଣ୍ଣ ରହିଛି । ତେବେ ରାହୁଲଙ୍କ ଜବରଦସ୍ତ ପ୍ରଦର୍ଶନ ଏହାକୁ ଭୁଲ ପ୍ରମାଣିତ କରିଛି ।