Tags : RAPE

ପୁରୀ: ଅସହାୟ ମହିଳାଙ୍କୁ ସୁରକ୍ଷା ଦେବା ବାହାନାରେ ଦୁଷ୍କର୍ମ । ଦୀର୍ଘ ୪ ମାସ ଧରି ଦୁଷ୍କର୍ମର ଶିକାର ହେବାପରେ ଶେଷରେ ମୁହଁ ଖୋଲିଲେ ପୀଡ଼ିତା । ଏଭଳି ଲଜ୍ଜାଜନକ ଘଟଣା ଘଟିଛି ପୁରୀ ଜିଲ୍ଲାରେ । ଦୁଷ୍କର୍ମକାରୀ ଜଣଙ୍କ ହେଉଛନ୍ତି କୁମୁଟିପାଟଣାରେ ଭଡ଼ାରେ ରହୁଥିବା ଦହିବରା ବ୍ୟବସାୟୀ ସୁବଳ ଚରଣ ସାହୁ ।
ଏନେଇ ପୁରୀ ତାଳବଣିଆ ଥାନାରେ ଅଭିଯୋଗ ପରେ ଏହି ଘଟଣା ସାମ୍ନାକୁ ଆସିଛି । ପୋଲିସ ଅଭିଯୁକ୍ତ ବିରୋଧରେ ମାମରା ରୁଜୁ କରି ଗିରଫ କରିବା ପରେ କୋର୍ଟ ଚାଲାଣ କରିଛି । ଜାମିନ ନାମଞ୍ଜୁର ହେବାରୁ ତାକୁ ଜେଲ୍ ପଠାଇ ଦିଆଯାଇଛି ବୋଲି କହିଛନ୍ତି ଆଇଆଇସି ସୁଜାତା ବେହେରା।
ପୋଲିସର ସୂଚନାଅନୁଯାୟୀ, ଗତ ୪ ମାସ ତଳେ ଅସହାୟ ଅବସ୍ଥାରେ ଥିବା ଜଣେ ସ୍ୱାମୀ ପରିତ୍ୟକ୍ତାଙ୍କୁ ସାହାଯ୍ୟର ହାତ ବଢାଇଥିଲା ସୁବଳ । ସ୍ଥାନୀୟ ସେନାପତିବଗିଚା ସ୍ଥିତ ଦରିଦ୍ରନାରାୟଣ ସେବାଶ୍ରମରେ ଘରଭଡା ବୁଝି ମହିଳାଙ୍କୁ ଆଶ୍ରୟ ଦେଇଥିଲା । କିନ୍ତୁ ଅସହାୟ ଅବସ୍ଥାର ସୁଯୋଗ ନେଇ ମହିଳା ଜଣଙ୍କୁ ଦୁଷ୍କର୍ମ କରିଥିଲା ସୁବଳ । ଏହି ଘଟଣା ନେଇ ଥାନାରେ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରି ମହିଳାଙ୍କ ଡାକ୍ତରୀ ମାଇନା କରିଛି ।
ତେବେ ଲଗାତର ଭାବେ ଟାଉନ ଥାନା, ସମୁଦ୍ରକୂଳ ଥାନା ଓ ବଳିଆପଣ୍ଡା ଥାନା ଅଞ୍ଚଳରେ ୩ ଜଣ ଶିଶୁକନ୍ୟାଙ୍କୁ ଦୁଷ୍କର୍ମ ଏବଂ ଯୌନ ନିର୍ୟାତନା ଦିଆଯିବା ଘଟଣା ପରେ ଏବେ ଦହିବରା ବ୍ୟବସାୟୀ ଜଣଙ୍କ ସୁରକ୍ଷା ଦେଇଥିବା ମହିଳାଙ୍କୁ ଦୁଷ୍କର୍ମ ମାମଲା ପୁରୀରେ ଆଲୋଡନ ଓ ଉଦବେଗ ସୃଷ୍ଟି କରିଛି।