Dec 9, 2025
ମୁଖ୍ୟ ଖବର
ବାରଙ୍ଗ: ନନ୍ଦନକାନନ ପ୍ରାଣୀ ଉଦ୍ୟାନରେ ଗତ ଜାନୁଆରୀ ମାସରୁ ଶିଶୁ ରେଳଗାଡ଼ି (ଟୟ ଟ୍ରେନ୍) ଚଳାଚଳ ବନ୍ଦ ଥିଲା । ଜାନୁୟାରୀ ୧୯ ତାରିଖ ଅପରାହ୍ଣରେ ପ୍ରାୟ ୫୦ରୁ ଊଦ୍ଧ୍ୱର୍ ପର୍ୟ୍ୟଟକଙ୍କୁ ନେଇ ଯାଉଥିବାବେଳେ ଅଧା ରାସ୍ତାରେ ଟ୍ରେନ ଲାଇନ୍ଚ୍ୟୁତ୍ ହୋଇଥିଲା । ସେବେଠାରୁ ପର୍ୟ୍ୟଟକଙ୍କ ସୁରକ୍ଷା ଦୃଷ୍ଟିରୁ କର୍ତ୍ତୃପକ୍ଷ ଶିଶୁ ରେଳଗାଡ଼ି ଚଳାଇବା ବନ୍ଦ ରଖିଥିଲେ । ଇତିମଧ୍ୟରେ ରେଳଗାଡ଼ିର ସବୁ ଯନ୍ତ୍ରାଂଶ ବଦଳାଯାଇ ନବୀକରଣ କରାଯାଇଛି । ଏବେ ତାହା ଗଡ଼ିବାକୁ ସମ୍ପୂର୍ଣ୍ଣ ପ୍ରସ୍ତୁତ । ଆଗକୁ ନନ୍ଦନକାନନ ପ୍ରତିଷ୍ଠା ଦିବସ ଥିବାରୁ ଖୁବ୍ଶୀଘ୍ର ଶିଶୁ ରେଳଗାଡ଼ି ଚାଲିବ ବୋଲି ଜଣାପଡିଛି ।
୧୯୭୧ ଅଗଷ୍ଟରେ ପ୍ରଥମ କରି ନନ୍ଦନକାନନରେ ଶିଶୁ ରେଳଗାଡି ଗଡ଼ିଥିଲା । ୨୦୦୬ ପର୍ୟ୍ୟନ୍ତ ନନ୍ଦନକାନନ କର୍ତ୍ତୃପକ୍ଷ ନିଜେ ଏହାକୁ ପରିଚାଳନା କରୁଥିଲେ । ଡିଜେଲ ଇଞ୍ଜିନ ଥିବାରୁ ବିଭିନ୍ନ ସମୟରେ ଯାନ୍ତ୍ରିକ ତୃଟି ଯୋଗୁ ଦୁଇ ବର୍ଷ ୨୦୦୮ ପର୍ୟ୍ୟନ୍ତ ତାହା ବନ୍ଦ କରାଯାଇଥିଲା । ପରେ ଇଞ୍ଜିନ୍ ଠିକ୍ କରି ଟେଣ୍ଡର ମାଧ୍ୟମରେ ୨୦୦୮ରୁ ଜଣେ ଠିକାଦାରଙ୍କ ଦ୍ୱାରା ଏହା ପରିଚାଳିତ ହେଲା । କିନ୍ତୁ ବେଶିଦିନ ଚାଲିପାରିଲାନି । ୨୦୧୪ରେ ବନ୍ଦ ହୋଇଗଲା । ଦୁଇ ବର୍ଷ ପରେ ପୁଣି ନନ୍ଦନକାନନ କର୍ତ୍ତୃପକ୍ଷ ନୂତନ ଜ୍ଞାନ କୌଶଳରେ ପ୍ରଦୂଷଣ ମୁକ୍ତ ଶିଶୁ ରେଳଗାଡି ଚଳାଇବାକୁ ନିଷ୍ପତ୍ତି ନେଲେ । ୨୦୧୬ ଅକ୍ଟୋବର ୨୦ରୁ ୨୦୨୦ ଡିସେମ୍ବର ମଧ୍ୟରେ ଆରଆଇଟିଇଏସ୍ ଲିମିଟେଡ ଏମ୍ସିଏଲ୍ ସିଏସ୍ଆର ପାଣ୍ଠି ଦ୍ୱାରା ୩୦୫ ଲକ୍ଷ ଟଙ୍କା ବ୍ୟୟରେ ରେଳ ଲାଇନ ଓ ପ୍ଲାଟଫର୍ମର ନବୀକରଣ ହୋଇଥିଲା । ପରେ ଏହା ୪୯୮.୬୩ ଲକ୍ଷ ଟଙ୍କାକୁ ବୃଦ୍ଧି ହୋଇଥିଲା । ଆମ୍ୟୁଜମେଣ୍ଟ ରାଇଟ୍ସ ଏବଂ ଫୟୁମ ୱାର୍ଲ୍ଡ ପାଟପରାଙ୍ଗ ଇଣ୍ଡଷ୍ଟ୍ରିକାଲ ଏରିଆ, ନୂଆଦିଲ୍ଲୀ ଦ୍ୱାରା ୮୧ ଲକ୍ଷ ୮୭ ହଜାର ୫୨୦ ଟଙ୍କାରେ ବ୍ୟାଟେରୀ ଚାଳିତ ଶିଶୁ ରେଳଗାଡି ନିର୍ମାଣ ହୋଇଥିଲା । ୨୦୨୧ ଅକ୍ଟୋବର ୮ରେ ଜଙ୍ଗଲ ମନ୍ତ୍ରୀ ଶିଶୁ ରେଳଗାଡ଼ି ଲୋକାର୍ପଣ କରିଥିଲେ । ତେବେ ରେଳ ଗାଡ଼ିଟି କମ୍ ସମୟ ଚାଲି ଅଧିକ ସମୟ ଖରାପ ହେଉଥିଲା ।
Comments ସମସ୍ତ ମତାମତ