Tags : karnatak congress

ବେଙ୍ଗାଲୁରୁ: କର୍ଣ୍ଣାଟକର କଂଗ୍ରେସ ସରକାରରେ ମୁଖ୍ୟମନ୍ତ୍ରୀ ସିଦ୍ଧରମେୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ମଧ୍ୟରେ କ୍ଷମତା ବିବାଦ ଲାଗି ରହିଛି। କ୍ଷମତା ବିବାଦ ଉପରେ ସଭାପତି ମଲ୍ଲିକାର୍ଜୁନ ଖଡଗେ ଦିଲ୍ଲୀରେ ରାହୁଲ ଗାନ୍ଧୀ ଓ ସୋନିଆ ଗାନ୍ଧୀଙ୍କ ସହିତ ଆଲୋଚନା କରିବାକୁ ସମୟ ଧାର୍ୟ୍ୟ କରିଛନ୍ତି। ଡିସେମ୍ବର ୧ରେ କର୍ଣ୍ଣାଟକ କ୍ଷମତା ବିବାଦ ଉପରେ ଆଲୋଚନା ହେବାକୁ ଥିବାବେଳେ ଶୁକ୍ରବାର ଏକ ସରକାରୀ କାର୍ୟ୍ୟକ୍ରମରେ ସିଦ୍ଧରମେୟା ଓ ଶିବକୁମାର ଏକାଠି ବସିଥିଲେ। ମହିଳା ଓ ଶିଶୁ କଲ୍ୟାଣ ବିଭାଗ ପକ୍ଷରୁ ଆରମ୍ଭ ହେବାକୁ ଥିବା ଗୃହଲକ୍ଷ୍ମୀ ସହକାର ଆପ୍‌ର ଉନ୍ମୋଚନ ଉତ୍ସବରେ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀ ଏକାଠି ବସିଥିଲେ। ଏକ୍ସରେ ସିଦ୍ଧରମେୟା ଲେଖିଛନ୍ତି ‘ସୁବର୍ଣ୍ଣ ମହୋତ୍ସବ’ ପାଳନରେ ଡିକେ ଶିମକୁମାରଙ୍କ ସହିତ ମନ୍ତ୍ରୀ ଲକ୍ଷ୍ମୀ ହେବାଲକର, ମହାଦେବପ୍ପା, କେଏଚ୍‌ ମୁନିୟାପ୍ପା, ଈଶ୍ବର ଖାଣ୍ଡରେ ଓ ଅନ୍ୟମାନେ ଉପସ୍ଥିତ ଥିଲେ।

ଅନ୍ୟପଟେ କ୍ଷମତା ବିବାଦକୁ ନେଇ ସିଦ୍ଧକୁମାରଙ୍କୁ ଶିବକୁମାର ସମାଲୋଚନା କରିଆସୁଥିବାବେଳେ ଶୁକ୍ରବାର ଏଥିରେ କିଛିଟା କୋହଳ ମନୋଭାବ ପୋଷଣ କରିଛନ୍ତି। ଗୁରୁବାର ପର୍ୟ୍ୟନ୍ତ ସିଦ୍ଧରମେୟାଙ୍କୁ ଶିବକୁମାର ପରୋକ୍ଷ ସମାଲୋଚନା କରିଆସୁଥିଲେ। ମୁଖ୍ୟମନ୍ତ୍ରୀ ନିଜର ପ୍ରତିଶ୍ରୁତି ପୂରଣ କରିବାରେ ବିଫଳ ହୋଇଥିବା ଶିବକୁମାର ବାରମ୍ବାର ଅଭିଯୋଗ କରୁଥିଲେ। କିନ୍ତୁ ଶୁକ୍ରବାର କାର୍ୟ୍ୟକ୍ରମରେ ଶିବକୁମାର କହିଥିଲେ ଯେ ମୁଖ୍ୟମନ୍ତ୍ରୀ ସିଦ୍ଧରମେୟା କଂଗ୍ରେସର ପ୍ରତିଶ୍ରୁତିକୁ ପୂରଣ କରିବାରେ ସଫଳ ହୋଇଛନ୍ତି। ପ୍ରଦେଶ କଂଗ୍ରେସ କମିଟି ସଭାପତି ଭାବେ ନିର୍ବାଚନରେ ସେ ଦେଇଥିବା ପ୍ରତିଶ୍ରୁତିକୁ ପୂରଣ କରିବାରେ ମୁଖ୍ୟମନ୍ତ୍ରୀ ସଫଳ ହୋଇଛନ୍ତି। ଉପମୁଖ୍ୟମନ୍ତ୍ରୀ ତାଙ୍କ ଭାଷଣରେ ସୋନିଆ ଗାନ୍ଧୀଙ୍କ ତ୍ୟାଗ ସମ୍ପର୍କରେ କହିଥିଲେ। ସୋନିଆ ୨୦ବର୍ଷ ଧରି କଂଗ୍ରେସର ସଭାପତି ପଦରେ ରହିଥିଲେ ମଧ୍ୟ ପ୍ରଧାନମନ୍ତ୍ରୀ ପଦକୁ ପ୍ରତ୍ୟାଖ୍ୟାନ କରିଥିଲେ।