Tags : CYCLONE

ନୂଆଦିଲ୍ଲୀ:ଦକ୍ଷିଣ-ପଶ୍ଚିମ ବଙ୍ଗୋପସାଗର ଏବଂ ସଂଲଗ୍ନ ଶ୍ରୀଲଙ୍କା ଉପକୂଳରେ ସୃଷ୍ଟି ଗଭୀର ଅବପାତ ବାତ୍ୟାରେ ପରିଣତ ହୋଇଛି । ଯାହାର ନାଁ ରହିଛି ‘ଡିଟୱା’। ତେବେ ଏହାର ପ୍ରଭାବରେ ତାମିଲନାଡୁର ଅଧିକାଂଶ ସ୍ଥାନରେ ୩୦ ତାରିଖ ଯାଏ ପ୍ରବଳ ବର୍ଷାର ସମ୍ଭାବନା ରହିଛି । ତାମିଲନାଡୁର ରାୟଲସୀମାରେ ଅତି ପ୍ରବଳ ବର୍ଷା ନେଇ ଆଇଏମ୍ଡି ପୂର୍ବାନୁମାନ କରିଛି । ଆନ୍ଧ୍ରପ୍ରଦେଶ ଓ କେରଳରେ ମଧ୍ୟ ଏହି ବାତ୍ୟାର ପ୍ରଭାବ ରହିବ । ସେପଟେ ଡଟୱା ଶ୍ରୀଲଙ୍କାର ମଧ୍ୟ ତାଣ୍ଡବ ରଚିଛି ।
ପାଣିପାଗ ବିଭାଗ ଅନୁସାରେ, ବାତ୍ୟା ଡଟୱାକୁ ନେଇ ତାମିଲନାଡୁ, ପୁଡୁଚେରୀ, ଦକ୍ଷିଣ ଆନ୍ଧ୍ର ଏବଂ ତେଲେଙ୍ଗାକୁ ଆଲର୍ଟ ଜାରି ହୋଇଛି । ଆସନ୍ତା ୩୦ ତାରିଖ ଯାଏ ପ୍ରବଳ ବର୍ଷା ସମ୍ଭାବନା । ଦକ୍ଷିଣ-ଦକ୍ଷିଣପୂର୍ବ ଚେନ୍ନାଇଠୁ ୫୮୦ ଏବଂ ଦକ୍ଷିଣ-ଦକ୍ଷିଣପୂର୍ବ ପୁଡୁଚେରୀଠୁ ୪୮୦ କିମି ଦୂରରେ ବାତ୍ୟା ଡଟୱା । ବାତ୍ୟା ବର୍ତ୍ତମାନ ଦକ୍ଷିଣ-ପଶ୍ଚିମ ବଙ୍ଗୋପସାଗର ଏବଂ ଶ୍ରୀଲଙ୍କା ନିକଟବର୍ତ୍ତୀ ଜଳଭାଗରେ କେନ୍ଦ୍ରିତ ହୋଇଛି । ଏହା ତାମିଲନାଡୁ-ପୁଡୁଚେରୀ-ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ଆଡକୁ ଗତି କରିବା ସହିତ ଆହୁରି ଘନୀଭୂତ ହୋଇପାରେ । ସେହିପରି ଅନ୍ୟ ଏକ ବାତ୍ୟା ସେନୟାରର ପ୍ରଭାବ କେବଳ ତାମିଲନାଡୁ ଉପରେ ରହିବ । ଏହାର ପ୍ରଭାବରେ ତାମିଲନାଡୁରେ ପ୍ରବଳ ବର୍ଷା-ପବନ ବହିବ ବୋଲି ଆଇଏଡି ପକ୍ଷରୁ ପୂର୍ବାନୁମାନ କରାଯାଇଛି ।

​​​​​୨୭ରୁ ୩୦ ନଭେମ୍ବର ଯାଏ ତାମିଲନାଡୁରେ ପ୍ରବଳ ବର୍ଷା ହେବ । ୨୮ ଏବଂ ୨୯ରେ କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବା ସମ୍ଭାବନା ରହିଛି । ଦକ୍ଷିଣ ଆନ୍ଧ୍ରପ୍ରଦେଶ ଏବଂ ରାୟଲସୀମା କ୍ଷେତ୍ରରେ ଆଜିଠୁ ଡିସେମ୍ବର ପହିଲା ଯାଏ ବର୍ଷା ଲାଗି ରହିବା ନେଇ ଅନୁମାନ କରାଯାଉଛି । ତାମିଲନାଡୁ, କେରଳ ଏବଂ ଉପକୂଳ ତଟବର୍ତ୍ତୀ ଆନ୍ଧ୍ରପ୍ରଦେଶ, କର୍ଣ୍ଣାଟକ ଏବଂ ଆଣ୍ଡାମାନ ନିକୋବରରେ ବିଜୁଳି, ଘଡଘଡି ସହ ବର୍ଷା ସମ୍ଭାବନା ରହିଛି । ପବନର ବେଗ ଘଣ୍ଟାପ୍ରତି ୩୦ରୁ ୫୦ କିମି ରହିବ । ବାତ୍ୟା ଡଟୱା ଶ୍ରୀଲଙ୍କା ବାଟିକାଲୋଆ ଅଞ୍ଚଳରୁ  ପ୍ରାୟ ୯୦ କିମି ଦୂରରେ ରହିଛି । ଶ୍ରୀଲଙ୍କାର ପୋଟୁଭିଲରେ ଡଟୱା ପ୍ରଭାବ ଦେଖିବାକୁ ମିଳିଛି । ନଭେମ୍ବର ୩୦ ସୁଦ୍ଧା ଉତ୍ତର ତାମିଲନାଡୁ- ପୁଡୁଚେରୀ- ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳରେ ସ୍ଥଳଭାଗ ଛୁଇଁବ ବୋଲି ଅନୁମାନ କରାଯାଉଛି ।